Cadernid
Un iaith sydd yn ei theithi - yn addo
hen hedd Ynys Enlli
hen arwriaeth Eryri
a hen nawdd Gwynedd i ni.
Ysgol
"Yn hon, pan ddelwn innau - y bu hwyl
heb ei ail... mae'ch lleisiau
ieuanc oll yn bywiocau
y cof am heulog hafau."
Maenor
Bŷr
(Wedi ymweld a'r eglwys a'r castell. Yma y claddwyd Gerallt Gymro a'i frawd.)
Teg awel hen dawelwch ym Mhenfro;
mae unfryd lonyddwch
hyd y lle; hen goed; a llwch
hen arwyr a synhwyrwch.
Tri Englyn
Gwydion Tomos
(Baban newydd Sue ac Aled Jones-Williams)
Wyt tramant ymysg plantos; wyt ddyheu;
Wyt ddewin chwedleuos;
Wyt ein dileit; wyt wên dlos;
Wyt yma, Gwydion Tomos!
Nofel
Am hon, am eiriau gonest, daw angau
dy dynged ddiamnest;
am y gwir, Solmon, mi gest
dy warchae am dy orchest.
Ymson
(Wedi derbyn y rhestr dasgau gan Aled)
Nid ydyw'n hawdd dwedyd, "Na!" - ac Aled
yn galw a^'r tasgau;
anodd im yw gwneud yn dda;
anos cyffesu hynna!
Disgyrchiant
A Newton yn pendroni
Uwch ystyr ein natur ni,
yno daeth, a disgyn, do,
fel hwyrnos afal arno;
un afal dihafal oedd,
afal a phwys canrifoedd
yn ei gwymp, yn syrthio'n gaeth
er enyn fflach athroniaeth
ar ei ben ... mewn amser byr
i Isaac, dyna'i gysur
wrth ddeddfu, tra'n barnu bant
"Does gwarchod rhag disgyrchiant!"
