Dorothy Jones

Teulu Ni

Mae Rhys yn chwarae Lego
A chodi tþ to fflat
A'r babi'n tynnu cynffon Pws
A'i halio hyd y mat;

Ond Nain sy'n chwarae bingo
A'i het ar dop ei phen,
Hwrê! caiff ddau bysgodyn aur
A bwni cynffon wen!

Chwarae Ysbryd

Ddoi di i chwarae ysbryd, Nain?
'Sdim isio golau 'sti,
Rhaid cau y drws yn glep rðan, Nain -
A dweud ti 'Bw-w-w' fel fi!

Mae isio rhedeg fel hyn, Nain
A dal i weiddi 'Bw-w-w';
Plant mawr sy'n chwarae ysbryd, Nain -
... Mae o'n beryg medden nhw!

... Ond Nain wyt ti go iawn - 'te, Nain,
Wyt ti isio golau nawr?
Does dim rhaid iti ofni, Nain,
Rydw innau'n hogyn mawr!

Cael Cam

Ew, bore Sadwrn dwaetha
Ces ffrae go iawn gan Mam;
Rwy'n siwr gwnewch chi gytuno
Fy mod i 'di cael cam!

'Mae wedi rhewi neithiwr,'
Medd hi, 'rhaid gwisgo cap.'
'O, na, dwi'n boeth,' atebais.
'Gwna fel dwi'n deud, go drap!'

'I'r cae 'na efo'r hogia
A hithau'n farug gwyn!
Os na roi gap ar unwaith
Rhaid aros mewn, fan hyn!'

    ...Tro cyntaf im gael chwarae
    I fechgyn Blwyddyn tri!
    Y ni 'di Man United!!
    ... Ond... Cap Lerpwl sydd gen i!

Hen Gath y Stryd

Mae'r gath goch heb gartref na ffrind yn y byd,
A phawb yn ei galw yn 'hen gath y stryd';
Mor ddel pan yn fechan - yn flewog a chwim,
Mae'n hen nawr a rhacsiog, heb goler na dim.

Ni chaiff hi byth Kitty-kat na physgod ffres, drud,
A sleifio i'r biniau mae hen gath y stryd.
Mae'n mewian drwy'r nos ar y to yn y glaw -
Bydd ffenestri'n agor -"Hysgiat, niwsans - taw!"

Rhag eira a rhewynt rhaid cyrlio wrth wal,
Breuddwydia am hufen a llygod i'w dal.
Pan fyddwch chi heno mewn gwely bach clyd
Meddyliwch am funud am hen gath y stryd!